રાજકોટ જંગલેશ્વર મેગા ડિમોલિશન: રાજકોટ શહેરમાં આજી નદીના કિનારે આવેલા જંગલેશ્વર વિસ્તારમાં છેલ્લા થોડા દિવસથી ચાલી રહેલી મેગા ડિમોલિશન કામગીરી હવે પૂર્ણ થઈ ગઈ છે. રાજકોટ મ્યુનિસિપલ કોર્પોરેશન (આરએમસી) દ્વારા હાથ ધરવામાં આવેલી આ કાર્યવાહી શહેરના ઇતિહાસમાં સૌથી મોટી ગણાઈ રહી છે.
આશરે ૧૫૦૦ જેટલા ગેરકાયદેસર બાંધકામો અને દબાણોને તોડી પાડવામાં આવ્યા છે. આમાં મોટા ભાગના ઘરો, ઝૂંપડપટ્ટીઓ અને થોડી દુકાનોનો સમાવેશ થાય છે. આ વિસ્તાર આજી નદીના પટ્ટા પર અને તેની બાજુમાં ૧૫ મીટરના ટાઉન પ્લાનિંગ રોડ પર ફેલાયેલો હતો. અહીં વર્ષોથી – કેટલાક તો ૪૦-૫૦ વર્ષથી – લોકો રહેતા હતા.
રાજકોટ મહાનગરપાલિકાના અધિકારીઓના કહેવા મુજબ, આ ડિમોલિશન નદીના કુદરતી પ્રવાહને પુનઃસ્થાપિત કરવા, પૂરના જોખમને ઘટાડવા અને ટ્રાફિકની સમસ્યા દૂર કરવા માટે કરવામાં આવી છે. ગુજરાતના નાયબ મુખ્યમંત્રી હર્ષ સંઘવીના આદેશ પર આ ઓપરેશન શરૂ થયું હતું.
કામગીરી દરમિયાન મોટી સંખ્યામાં પોલીસ જવાનો (૨૫૦૦થી વધુ), મ્યુનિસિપલ કર્મચારીઓ (૧૧૦૦થી વધુ), જેએસીબી મશીનો, ટ્રેક્ટર અને અન્ય હેવી મશીનરી તૈનાત કરવામાં આવી હતી. ડ્રોનથી પણ નિરીક્ષણ કરવામાં આવ્યું હતું. ગુજરાત હાઈકોર્ટમાં સ્થાનિક લોકોએ અરજી કરી હતી, પણ કોર્ટે તાત્કાલિક રોક ન લગાવી.
આ ડિમોલિશન થી અનેક પરિવારો બેઘર થયા છે. કેટલાક લોકોએ કહ્યું કે, “અમે અહીં ૬૦ વર્ષથી રહીએ છીએ, એક જ દિવસમાં બધું ખતમ થઈ ગયું.” તંત્ર દ્વારા કેટલાક લોકોએ પોતાના બાંધકામો જાતે તોડ્યા હતા. ધાર્મિક સ્થળોને પણ સન્માનપૂર્વક હટાવવામાં આવ્યા હતા.
હવે આ વિસ્તારમાં નદીની સફાઈ અને રોડનું કામ ઝડપથી શરૂ થશે એવી આશા છે. શહેરના વિકાસ માટે આ પગલું જરૂરી હતું એવું અધિકારીઓ કહે છે, પણ જે લોકો પ્રભાવિત થયા છે તેમના માટે આ સમય ખૂબ મુશ્કેલ છે.
આ પણ વાંચો : આયુર્વેદિક સવારની 5 સરળ આદતો | 2026માં તંદુરસ્ત શરૂઆત
